मालामाल हरामी नाचैं....

आगे-आगे कौवा नाचैं।
पीछे से गुह-खौवा नाचैं।
हौवी नाचै, हौवा नाचैं।
पी के अद्धा-पौवा नाचैं।

वीबी नाचै, सैंया नाचै।
संग में सोन चिरैया नाचै।
भौजी नाचै, भैया नाचै।
छमछम, ताता-थैया नाचै।

सीधे, कबौं बकइयां नाचै।
कचाकच्च गलबइयां नाचै।
चड्ढी में मुंबइया नाचै।
चोली बीच रुपइया नाचै।

लट्टू ऊपर लट्टू नाचैं।
राजनीति के टट्टू नाचैं।
चारो ओर निखट्टू नाचैं।
कुर्सी पर मुंह-चट्टू नाचैं।

महंगी उचक अटारी नाचै।
एमए पास बेकारी नाचै।
घर-घर में लाचारी नाचै।
दिल्ली तक दुश्वारी नाचै।

गा-गाकर कव्वाली नाचैं।
बजा-बजाकर ताली नाचैं।
गुंडा और मवाली नाचैं।
औ उनकी घरवाली नाचैं।

शहर-शहर उजियारी नाचैं।
गांव-गांव अंधियारी नाचै।
कूकर खद्दरधारी नाचैं।
अफसर चोर-चकारी नाचैं।

गाल बजावत मल्लू नाचै।
सिंहासन पर कल्लू नाचै।
ठोकैं ताल निठल्लू नाचै।
मंत्री बन के लल्लू नाचै।

छूरा नाचै, चाकू नाचै।
पट्टी पढ़े-पढ़ाकू नाचैं।
चुटकी-मार तमाकू नाचै।
साधु वेश में डाकू नाचै।

रात-रात भर टामी नाचै।
मामा के संग मामी नाचै।
उजड़े हुए असामी नाचैं।
मालामाल हरामी नाचैं।

ताकधिनाधिन...ताकधिनाधिन...ताकधिनाधिन...त्ता-आआआ।